जनकपुरधाम । नेपाली कांग्रेसका उपसभापति विमलेन्द्र निधिले संविधान संशोधनको मुद्दालाई कांग्रेसले मात्र जिवन्त राखेको बताएका छन् ।
आज जनकपुरमा सञ्चारकर्मीहरुसँग कुरा गर्दै उपसभापति निधिले मधेसका नाममा मत लिएकाहरुले संविधान संशोधनको मुद्दा बिर्सिसकेको आरोप लगाए ।
संविधान संशोधनको मुद्दालाई नछाड्ने भन्दै उनले कांग्रेसले मात्रै संविधान संशोधन गराउने दाबी गरे ।
संविधान संशोधनलाई मुद्दा बनाएर जनताको मत लिएका फोरम र राजपा संविधान संशोधनको मुद्दा बिर्सिसकेको उनले बताए । ‘राजपाले पनि यो मुद्दा छाडिसकेको छ’ निधिले भने, ‘सरकारमा रहेका उपेन्द्रको पार्टी त झन संशोधनको पक्षमा छैन ।’
कांग्रेस उपसभापति निधिले सकार संघीयतालाई समाप्त पार्न लागेको आरोप पनि लगाए । ‘संघीयतालाई बर्बाद पार्दै सरकार भ्रष्टाचारमा चुर्लुम्म डुबेको छ’ उनले भने, ‘सरकारको यही रबैयालाई जनता समक्ष ल्याउनका लागि हामीले भोलिबाट देशभर जागरण अभियान सुरु गर्दैछौं ।’
