साविक विजेता चेन्नाई सुपर किंग्सलाई पराजित गर्दै मुम्बई इन्डियन्स इन्डियन प्रिमियर लिग (आइपीएल) २०१९ को फाइनलमा प्रवेश गरेको छ।
मंगलावार भएको क्वालिफायरमा मुम्बईले चेन्नाईलाई उसैको मैदानमा ६ विकेटले पराजित गरेको हो। यस सिजन चेन्नाईमाथि मुम्बईको यो तेस्रो जित हो। यसअघि लिग चरणमा मुम्बईले चेन्नाईलाई दुव खेलमा हराएको थियो।
मुम्बईले अब उपाधिका लागि दोस्रो क्वालिफायर (चेन्नाई भर्सेस दिल्ली/हैदरावाद) को विजेतासँग खेल्नेछ। मुम्बईसँग हारेपनि चेन्नाईले फाइनल प्रवेशका लागि अर्को अवसर पाउनेछ। दिल्ली क्यापिटल्स र सनराइजर्स हैदरावादबीच हुने एलिमिनेटरको विजेतासँग चेन्नाईले फाइनल प्रवेशका लागि खेल्नेछ।
तीन पटकको च्याम्पियन मुम्बई फाइनल पुगेको यो पाँचौ पटक हो। सन् २०१० मा पहिलो पटक फाइनल खेल्दा चेन्नाईसँग पराजित भएको मुम्बईले सन् २०१३, २०१५ र २०१७ मा उपाधि जितेको थियो।
