बीरगंज, ३१ बैशाख — साइप्रसमा पछिल्लो केही हप्ताभित्र एक नेपाली सहित सात जना प्रवासी महिलाको हत्या भएको छ । यो घटनापछि अहिले साइप्रसमा त्राश र भय उत्पन्न भएको छ । यो द्वीपीय देशमा सिरियल किलिंगलाई लिएर मानिसहरुमा आक्रोश देखिएको छ ।
अन्तराष्ट्रिय सन्चार माध्यमका अनुसार, अप्रिलदेखि अहिलेसम्म सात जना प्रवासी महिलाको हत्या भएको हो, जसमा एकजना नेपाली र चारजना फिलिपिन्सका महिला रहेका छन् । त्यसैगरी हत्या गरिएकामा ६ देखि ८ वर्षसम्मका दुईजना बालिका पनि रहेका छन् ।
यो हत्यालाई लिएर अहिले मानिसहरु सडकमा आएका छन् र प्रदर्शन गरिरहेका छन् । पछिल्लो दिन राजधानी निकोसियामा भएको प्रदर्शनमा ठूलो संख्यामा मानिसहरु सहभागी भएका थिए । हत्या गरिएका महिलाहरुको परिचय भने खुलाइएको छैन ।
