बीरगंज, ३१ बैशाख — पाँचथरको फाल्गुनन्द गाउँपालिकाको कार्यालयमा मंगलबार घुर्बिसे पञ्चमीका स्थानीयले ताला लगाएका छन् ।
घुर्बिसे पञ्चमीबाट सेवा केन्द्र अन्यत्र सार्ने गाउँसभाको निर्णय विरुद्ध पञ्चमीवासी आन्दोलनमा उत्रिएको गाउँपालिकाका प्रमुख प्रशासकीय अधिकृत अनिल खत्रिले बताउनुभयो । सोमबार सम्पन्न गाउँसभाले फाल्गुनन्द गाउँपालिका ५ फाक्तेपको याम्पाबुडदेखि मुन्तिर र कोल्बुङदेखि मास्तिर हुनेगरी सेवा केन्द्र सार्ने निर्णय गरेको थियो ।
सेवा केन्द्र पञ्चमीमै राख्नुपर्ने माग राख्दै पञ्चमी बजारका स्थानीय आन्दोलमा उत्रिएका स्थानीय बिनोद कुमार आङ्देम्बेले बताउनुभयो । उहाँका अनुसार स्थानीयले बजार पसल बन्द गरेका छन् । पञ्चमी आसपासका शैक्षिक संस्था पनि बन्द गर्न आह्वान गरिएको छ । यातायात पनि बन्द गरिएको छ ।
स्थानीयसवासीलाई आन्दोलन फिर्ता लिएर छलफलमा आउन गाउँपालिकाले पहल गरिरहेको गाउँपालिकाका कार्यबाहक अध्यक्ष देवित्रा आङ्देम्बेले जानकारी दिनुभयो ।
