वीरगन्ज, ३ ज्येष्ठ — प्रदेश संसदमा विचाराधीन रहेको संचारसम्बन्धी विधेयकमा जरिवानासम्बन्धी वाक्यांश र शब्दहरू त्रुटीवश पर्न गएको भन्दै प्रदेश २ सरकारले सच्याउने प्रतिबद्धता जनाएको छ ।
प्रदेश न. २ का आन्तरीक मामिला तथा कानुन मन्त्रि ज्ञानेन्द्र कुमार यादबले ाशुक्रवार एक विज्ञप्ति जारी गर्दै संचारकर्मीहरूले सम्प्रभुता विरुद्ध समाचार लेखेमा ५० लाखदेखि १ करोडसम्म जरिवाना गर्ने भन्ने वाक्यांश र अन्य केही शब्दावली प्राविधिक त्रुटिवश पर्न गएकाले यसलाई संचारकर्मीहरूको थप परामर्शबाट संशोधन परिमार्जन गरिने प्रतिवद्धता ब्यक्त गर्नुभएको छ ।
’प्रदेश संसदमा विचाराधीन संचारसम्बन्धी विधेयकका केही प्रावधानप्रति संचारकर्मीले असहमति र अस्वीकारोक्ति व्यक्त गर्नुभएको विषयप्रति गम्भीर ध्यानाकर्षण भएको छ,’ विज्ञप्तिमा उल्लेख छ, ’प्रेस स्वतन्त्रताको बहुआयामिक पक्षमाथि आघात पुग्ने र संचारकर्मीहरूको जनउत्तरदायी कार्य निषेध गर्ने कुनै पनि प्रयत्न वा नियत प्रदेश सरकारको नरहेको प्रष्ट गर्न चाहन्छु ।’ बिज्ञप्तीमा भनिएको छ ।
