बीरगंज, ११ जेठ — प्रदेश न. २ का मुख्यमन्त्री लालबाबु राउतले प्राधिकरण बनाएर गढीमाई र सिम्रौनगढको विकास गर्ने घोषणा गर्नुभएको छ ।
बाराको गढीमाई मन्दिर संचालन तथा विकास समितिको चौथो साधारणसभाको शनिबार उद्घाटन गर्दै मुख्यमन्त्री राउतले प्राधिकरण बनाएर दुवै स्थललाई पर्यटकीय गन्तव्यको रुपमा विकास गर्ने धारणा राख्नुभयो ।
दुवै स्थलको विकासको लागि प्रदेश सरकार गंभिर छ, उहाँले भन्नुभयो गढीमाई र सिम्रौनगढलाई विश्वमा चिनाउने गरी काम हुन्छ ।
सबैभन्दा बढी प्रदान हुने स्थलमध्ये एक गढीमाई र ऐतिहासिक सिम्रौनगढ राज्यबाट उपेक्षित हुँदा धार्मिक पर्यटकीय स्थलको रुपमा विकास हुन नसकेको उहाँले दावी गर्नुभयो ।
गढीमाई मेलामा लाखौको संख्यामा श्रद्धालुभक्तजन आउने गरेपनि मेला व्यवस्थापन हुन नसक्दा श्रद्धालुलाई समस्या हुँदै आएको उहाँले थप्नुभयो ।
यसै वर्षमा आयोजना हुन लागेको गढीमाईको मेला व्यवस्थापनको लागि प्रदेश सरकारले सक्दो सहयोग गर्ने मुख्यमन्त्री राउतले बताउनुभयो ।
मेलामा शौचालय, खानेपानी लगायतको व्यवस्थापनमा प्रदेश सरकारले सहयोग गर्ने उहाँले थप्नुभयो ।
रामचन्द्र साहको अध्यक्षतामा भएको साधारणसभाको उद्घाटन सत्रमा भौतिक पुर्वाधार विकास मन्त्री जीतेन्द्र सोनलले गढीमाई र सिम्रौनगढको विकास गर्न प्रदेश सरकार तयार रहेको बताउनुभयो । प्रदेश सरकारको सहयोगमा गढीमाईमा ७ करोड ६० लाखको विवाहमण्डप र धर्मशाला निर्माण भइरहेको जानकरी उहाँले दिनुभयो ।
विकास निर्माणको काममा राजनीति नगर्नको लागि आग्रह गर्दै मन्त्री सोनलले प्रदेश सरकार सबैसित सहकार्य गरेर काम गर्न तयार रहेको बताउनुभयो ।
सो अवसरमा समाजवादी पार्टी नेपालका महासचिव एवम् प्रतिनिधिसभा सदस्य रामसहाय यादवले गढीमाई र सिम्रौनगढको विकास कार्य अगाडी बढिसकेको बताउनुभयो । दुवै स्थलको विकासमा संघीय र प्रदेश सरकार गंभिर रहेको उहाँले थप्नुभयो ।
कार्यक्रममा प्रदेससभा सदस्य पारस साह, स्थानीय तहका प्रमुख, उपप्रमुख, स्थानीय राजनीतिक दलका प्रतिनिधिहरुको उपस्थिति रहेको मुख्यमन्त्रिका स्वकिय सचिब दिपक यादबले जानकारी दिनुभयो ।
