भारतमा लोकसभाको चुनावको नतिजा आउने क्रम जारी छ । विशुद्ध राजनीतिज्ञ मात्र नभएर भारतमा चलचित्र कर्मी, खेलाडी तथा अन्य विधामा चर्चा कमाएका व्यक्तिहरू यसपाली चुनावी मैदानमा थिए । नतिजामा सर्वत्र भाजपा हावी भइरहेका बेला भाजपासँग आवद्ध कलाकार, गायक, खेलाडी वा अन्य विधाका व्यक्तिहरू पनि आफ्नो पक्षमा नतिजा पार्न सफल भएका छन् ।
चुनावको नतिजाले काङ्ग्रेसलाई निकै कमजोर देखाइरहेको छ । यस्तैमा काङ्ग्रेसका अध्यक्ष राहुल गान्धीलाई अभिनेत्री तथा भाजपाकी केन्द्रिय मन्त्री स्मृति ईरानीले हराएकी छन् । चुनावमा काङ्ग्रेसलाई अचम्मित पार्ने समाचारको रुपमा स्मृतिसँग राहुलको हारलाई हेरिएको छ । स्मृति लामो समय टेलिसिरियलमा सक्रिय रुपमा काम गरेकी थिइन् ।
स्मृति लगायत धेरै कलाकारले चुनावमा उम्मेद्वारी पेश गरेका थिए ।
सनी देओल
लोकसभाको चुनाव भन्दा केही दिन पहिले भाजपाको सदस्यता लिएका अभिनेता सनी देओलले जित हात पारेका छन् । पन्जाबको गुरदासपुरबाट उठेका सनीको निकटतम प्रतिद्वन्द्वी पन्जाब प्रदेशका काङ्ग्रेस अध्यक्ष सांसद सुनील जाखड रहेका थिए ।
हेमा मालिनी
वरिष्ठ अभिनेत्री हेमा मालिनी भाजपाकी नयाँ सदस्य होइनन् । उनको यो दोस्रो चुनाव हो र दोस्रो पटक पनि उनले काङ्ग्रेसका महेश पाठक र गठबन्धनका नरेन्द्र सिंहलाई पछि पार्दै जित हात पारेकी हुन् ।
शत्रुघ्न सिन्हा
भाजपाबाट काङ्ग्रेसमा गएका अभिनता शत्रुघ्नले भने हार व्यहोर्नु परेको छ । भाजपाको केन्द्रिय मन्त्री रवि शंकर प्रसादसँग प्रतिस्पार्धा रहेकोमा शत्रुघ्नले नमिठो हार व्यहोर्नु परेको हो । दुवैको सम्भावना भने धेरैले बराबर रहेको अनुमान चुनाव अघिदेखि नै गर्दै आएका थिए ।
उर्मिला मातोडकर
अभिनेत्री उर्मिला मातोडकरले पनि चुनावको निराशाजनक अनुभव पाएकी छन् । काङ्ग्रेसबाट उठेकी उनले भाजपाका उम्मेद्वारसँग हार व्यहोर्नु परेको थियो । त्यस्तै अभिनेता राज बब्बर, निरहुआ चुनावमा हार व्यहोरेका छन् । भने मनोज तिवारी, मनसुन सेनले भाजपाबाट उठ्दै चुनावमा जित हात पारेका छन् । त्यस्तै भारतीय क्रिकेट टोलीका पूर्व सदस्य गौतम गम्भिरले पनि चुनावमा जित हात पारेका छन् ।
पछिल्लो समय भारतमा कला क्षेत्रका धेरैको राजनीतिमा प्रवेश भएको छ । यस लोकसभा चुनावले भाजपामा रहेका सबै कलाकारको जित र भाजपा बाहेकका पार्टिबाट उठेका सबै कलाकारको हार देखाएको छ ।
