काठमाडौं । सत्तारुढ दल नेपाल कम्युनिष्ट पार्टी (नेकपा)का दुई अध्यक्ष केपी शर्मा ओली र पुष्पकमल दाहाल (प्रचण्ड)बीच आज भेटवार्ता भएको छ । मंगलबार प्रधानमन्त्री निवास बालुवाटारमा दुई अध्यक्षबीच डेढ घण्टा एक्ला–एक्लै वार्ता भएको हो । दुई अध्यक्षबीच असार २४ यता भेटावार्ता भएको थिएन ।
झण्डै एक हप्तापछि भएको वार्तामा छलफललाई निरन्तरता दिन दुवै अध्यक्ष राजी भएको बताइएको छ । प्रधानमन्त्री ओलीका प्रेस विज्ञ रामशरण बजगाईँले पनि दुई अध्यक्षबीच राम्रो वातावरणमा छलफल भएको बताए ।
अघिल्लो हप्ताको बुधबार–एक्ला एक्लैको भेटमा ओली र प्रचण्डबीच भनाभनसमेत भएको थियो। सोही क्रममा ओली उठेर हिँडेपछि प्रचण्ड पनि खुमलटार फर्किएका थिए। त्यसयता ओली प्रचण्डबीच पहिलो पटक भेट भएको हो । प्रधानमन्त्री तथा पार्टी अध्यक्षबाट ओलीको राजीनामा माग भएपछि नेकपा स्थायी कमिटी बैठक अवरुद्ध भएको छ । साउन २ गते सम्म बैठक स्थगित गरिएको छ ।