उपचार गरेको शुल्क तिर्न नसकेपछि विराटनगरस्थित नोबेल मेडिकल कलेजले सप्तरीका एक दलित सुमदायका व्यक्तिकाे शव रोकेर राखेको छ । उपचारका क्रमममा शनिबार मृत्यु भएका सप्तरीको महुली गाउँपालिका- ६ मोहनपुरका ६७ वर्षीय सनमन सार्कीको शव अस्पतालमै रहेकोले आफन्तले अन्तिम संस्कार गर्न पाएका छैनन् ।
सार्कीको उपचार र औषधि वापतको ११ लाख रुपैयाँ तिर्नुपर्ने बाँकी रहेको अस्पतालले जानकारी दिएको छ । पैसा तिर्न नसकेपछि नोबेलले बुबा सनमनको शव लैजान नदिएको जेठा छोरा नवीन अछामीले बताए ।
आफूहरूसँग त्यत्रो रकम तिर्नसक्ने अवस्था नभएको उनको भनाइ छ । उच्च रक्त्तचापका बिरामी सनमनको गत ५ चैतदेखि नोबेलमा उपचार भइरहेको थियो । उनलाई २५ दिन आइसीयूमा र ४ दिन भेन्टिलेटरमा राखिएको थियो । उपचारवापत अस्पताल प्रशासनको ५ लाख र औषधि वापतको औषधि पसलमा ६ लाख रुपैयाँ तिर्न बाँकी रहेको नोबेलले जनाएको छ ।
पैसा तिर्नसक्ने क्षमता आफूहरूको नभएको र शव लैजान अस्पतालले नदिएकाले बुबाको अन्तिम संस्कार गर्न नपाएको छोरा नवीनको गुनासो छ । उनी नोबेल अस्पतालमा भौँतारिदै आफूसँग उपचार शुल्क तिर्नसक्ने अवस्था नभएकोले शव लैजान दिन नोबेल प्रशासनसँग हारगुहार गरिररहेका छन् ।
अस्पतलाका जनसम्पर्क अधिकृत नारायण दाहालले तिर्नुपर्ने शुल्क धेरै भएकोले प्रशासनले निर्णय गर्नसक्ने अवस्था नभएको बताए । यसबारेमा अध्यक्ष सुनील शर्माले मात्र निर्णय दिनसक्ने उनको बताए ।
सुकुम्बासी बस्तीमा बस्दै आएका मृतक सनमन र उनको परिवार दैनिक ज्याला मजदुरी गरेर गुजारा चलाउने गर्दछन् । जेठा छोरा २७ वर्षीय नवीन र अर्का छोरा २४ वर्षीय कुमार दुबै मिस्त्री काम गर्दछन् । श्रीमानको मृत्युपछि ६१ वर्षकी आमा सीता बेहोस अवस्थामा छन् ।
छोरा नवीनका अनुसार बुबाकोे मृत्युपछि पैसा तिर्न नसक्दा अस्पताल र फार्मेसीका प्रतिनिधिहरू घरजग्गा धरौटी राख्न सकिन्छ कि भनेर महुली पनि पुगेका थिए । तर, सुकुम्बासी परिवार भएकोले असुल उपर गर्नसक्ने अवस्था नभएपछि उनीहरू चुपचाप फर्किए । त्यसपछि झन् अस्पतालले पैसा तिरे मात्र बाबुको शव लैजान दिने अडान लिएको छ ।
बुबाको उपचारमा ऋण खोजेर यसअघि ३ लाख रुपैयाँ खर्च गरेको बताउँदै नवीनले बुबाको अन्तिम संस्कार गर्ने व्यवस्था मिलाईदिन सबैसँग गुहार गरेका छन् ।