काठमाडौं २५ भदाै । काठमाडौं उपत्यकामा निषेधाज्ञा खुकुलो पारिएसँगै चहलपहल बढेको छ ।
काठमाडौं, भक्तपुर र ललितपुर जिल्ला प्रशासनले तीन सातादेखि लगाइएको निषेधाज्ञालाई खुकुलो पार्दै व्यापार–व्यवसाय खोल्न र निजी तथा सार्वजनिक सवारीसाधन जोरबिजोर प्रणालीमा सञ्चालन गर्न दिने निर्णय गरेसँगै आजबाट चहलपहल बढेको हो ।
पसल व्यवसाय आलोपालो प्रणालीमा सञ्चालन हुने भएपनि बढी भिडभाड हुने जात्रा, महोत्सव, चाडपर्व, सांस्कृतिक तथा धार्मिक गतिविधिलगायतमा लगाइएको निषेधाज्ञा भने आगामी ३१ गते मध्यरातिसम्म लम्ब्याइएको छ ।
निषेधाज्ञाको नयाँ मोडालिटीअनुसार निजी तथा सार्वजनिक सवारीसाधन जोरबिजोर प्रणालीअनुसार सञ्चालन गर्न पाइनेछ । सपिङ मल, फेन्सी स्टोर, कपडा, जुत्ता, कस्मेटिकलगायत पसल साताको तीन दिन सोमबार, बुधबार र शनिबार मात्रै खोल्न पाइनेछ ।
भाडा र भान्साजन्य साथै सोही प्रकृतिका अन्य पसल आइतबार र मंगलबार मात्रै खोल्न पाउने बनाइएको छ । फर्निचर र अटो मोबाइलसम्बन्धी पसल सोमबार र बुधबार मात्रै खोल्नुपर्ने छ ।
कुल सिट संख्याको आधाभन्दा नबढ्ने गरी भौतिक दूरी कायम गरेर सार्वजनिक यातायात सञ्चालन गर्न पाइनेछ । होटल /रेस्टुरामा टेक–अवे र अनलाइन डेलिभरी सेवा मध्याह्न १२ देखि साँझ ७ बजेसम्म सञ्चालन गर्न पाइनेछ ।