काठमाडौं । सत्तारूढ नेपाल कम्युनिस्ट पार्टी (नेकपा) को स्थायी कमिटी बैठकमा केहीबेर सहभागी भएर प्रधानमन्त्री केपी शर्मा ओली बाहिरिएका छन् ।
पार्टी अध्यक्षसमेत रहेका ओलीले बैठकको सुरुमै आफ्ना कुरा राखेर बाहिरिएको स्रोतले बतायो । करिब २० मिनेट जति बसेका ओलीले बैठक सञ्चालनको जिम्मा अर्का अध्यक्ष पुष्पकमल दाहाल प्रचण्डलाई दिँदै बाहिरिएका हुन् ।
असार १८ गतेदेखि अवरूद्ध रहँदै आएको नेकपा स्थायी कमिटी बैठक शुक्रबार बिहान ११ बजेदेखि बालुवाटारमा जारी छ ।
बैठकमा नेकपा कार्यदलले तयार पारेको प्रतिवेदन प्रस्तावको रूपमा पेस हुने जनाइएको छ ।
प्रतिवेदनलाई दुई अध्यक्ष केपी शर्मा ओली र पुष्पकमल दाहाल प्रचण्डले परिमार्जन गरेर प्रस्तावको रुप दिएका हुन् । प्रस्ताव पारित गरेपछि बैठक आजै टुङग्याउने सम्भावना रहेको स्रोतले बतायो ।
बैठकअघि आजै प्रधानमन्त्री ओली र अर्का अध्यक्ष प्रचण्डबीच बालुवाटारमा छलफल भएको थियो ।