काठमाडौं, २८ भदौ- पहिरो प्रभावितलाई भेट्न प्रतिनिभिसभाका सभामुख अग्निप्रसाद सापकोटा सिन्धुपाल्चोक प्रस्थान गरेका छन् । मौसम अनुकूल भए उद्धारका लागि हेलिकोप्टर पनि पठाउने तयारी भइरहेको सभामुख सापकोटाका प्रेस सल्लाहकार श्रीधर न्यौपानेले जानकारी दिए ।
लगातारको वर्षाले बाह्रविसे नगरपालिका- ७ घुम्थाङको नागपुजेमा गएराति खसेको पहिरोमा पुरिएकी एक महिलाको शव फेला परेको छ ।
नागपुजेमा एक जनाको शव भेटिएको आफूले सूचना पाएको बाह्रबिसे नगरपालिकाका प्रमुख निमफुञ्जो शेर्पाले बताए । ‘ठूलै मानवीय क्षति भएको हुन सक्ने खबर सुनेर घटनास्थलतर्फ जाँदैछु,’ शेर्पाले भने ।
इलाका प्रहरी बाह्रबिसेका प्रहरी निरीक्षक नवराज न्यौपानेले नागपुजेमा सात घरका १७ जना बेपत्ताको सूची निकालिएको जानकारी दिए । नागपुजेमा कम्तीमा आठ घर र भीरखर्कमा कम्तीमा १० घर पुरिएको स्थानीयले बताएका छन् ।
