बीरगन्ज१४ मंसिर – नेपाल उद्योग वाणिज्य महासंघको सम्पन्न भएको निर्वाचनमा बीरगन्जका दुई व्यवसायी केन्द्रीय सदस्यमा निर्वाचित भएका छन् । शनिबार सम्पन्न भएको निर्वाचनको मतपरिणाम अनुसार बीरगन्ज उद्योग वाणिज्य संघका बर्तमानअध्यक्ष गोपाल केडिया तथा वरिष्ठ उपाध्यक्ष सुवोध कुमार गुप्ता केन्द्रीय सदस्यमा निर्वाचित भएका छन् ।
केडिया महासंघको जिल्ला नगरतर्फको कार्यकारिणी समितिको सदस्यमा निर्वाचित भएका छन् भने गुप्ता बस्तुगत तर्फबाट केन्द्रीय कार्यकारिणी सदस्यमा निर्वाचित भएका छन् ।
बीरगन्जलाई प्रतिनिधित्व गर्दै चुनावी मैदानमा उत्रेका केडिया र गुप्ता छुट्टाछुट्टै समुहबाट केन्द्रीय सदस्यमा निर्वाचित भएका छन् । किशोर प्रधान समूहबाट जिल्ला नगरतर्फको कार्यकारिणी समितिको सदस्यमा निर्वाचन लडेका गोपाल केडियाले ५५ मत ल्याएका थिए ।
त्यसैगरी चन्द्र ढकाल समूहबाट बस्तुगत तर्फबाट केन्द्रीय कार्यकारिणी सदस्यमा निर्वाचन लडेका गुप्ताले पनि ५५ मत ल्याएका छन् । बस्तुगत तर्फबाट केन्द्रीय कार्यकारिणी सदस्यमा निर्वाचित गुप्ता नेपाल चामल, दाल, तेल उद्योग संघका राष्ट्रिय अध्यक्ष समेत हुन् ।