काठमाडौ । नेपाली कांग्रेसका वरिष्ठ नेता रामचन्द्र पौडेलले आज तनहुँको बुल्दी खोलामाथिको पुल उद्घाटन गरेका छन् । सयौँ कार्यकर्ताको जुलुससहित बुल्दी खोला पुगेका पौडेलले उक्त पुल उद्घाटन गरेका हुन् । आज भने प्रहरीले पौडेलको उद्घाटन कार्यक्रमलाई कुनै अवरोध गरेको देखिएन । हिजो पुल उद्घाटन गर्न पुगेका नेता पौडेललाई प्रहरीले नियन्त्रणमा लिएको थियो ।
पौडेलले पुल उद्घाटन गर्न खोजेपछि सत्तारूढ नेकपा र प्रतिपक्षी कांग्रेसका कार्यकर्ताबीच झडप हुनसक्ने भन्दै तनहुँ प्रशासनले निषेधाज्ञा जारी गरेको थियो । तर, निषेधाज्ञाकै बीच पौडेल पुल उदघाटन गर्न जान खोजेपछि प्रहरीले उनलाई तीनघन्टा नियन्त्रणमा लिएको थियो । तनहुँ प्रहरीले नेता पौडेललाई गिरफ्तार गरी हिरासतमा राखेपछि कांग्रेस सभापति शेरबहादुर देउवाले प्रधानमन्त्री ओलीलाई टेलिफोन गरी तत्काल रिहाइ गर्न माग गरेका थिए ।
