काठमाडौं । प्रमुख प्रतिपक्षी, नेपाली कांग्रेसले सरकारविरुद्ध मंसिर २९ गते ७७ वटै जिल्लामा विरोध प्रदर्शन गर्ने भएको छ । पदाधिकारी र पूर्वपदाधिकारीहरुको शुक्रबार बसेको बैठकले गत १७ गते ‘तनहुँमा वरिष्ठ नेता रामचन्द्र पौडेलमाथि गरेको दमनकारी ब्यवहारको विरोधमा प्रदर्शन गर्ने निर्णय गरेको हो ।
साथै देशको विभिन्न भागमा पटक–पटक सरकारबाट प्रस्तुत विभेद, पक्षपात र सर्वसत्तावादी प्रवृत्ति तथा कोभिड—१९ को नियन्त्रण र उपचारमा सरकारले देखाएको उदासिनता र अकर्मण्यता तथा स्वास्थ सामग्री खरिदमा गरिएको भ्रष्टाचार देखि अनेकन भ्रष्टाचार काण्ड र बेथिति विरुद्ध विरोध प्रदर्शन गर्ने निर्णय भएको कांग्रेस मुख्य सचिव कृष्णप्रसाद पौडेलले जानकारी दिए ।
यस्तै कांग्रेसले संसद बैठक अविलम्ब बोलाउन सरकार र सभामुखसमक्ष माग गर्ने निर्णय गरेको छ ।
राष्ट्रिय रूपमा उठेका जीवन्त प्रश्नहरू संगै देश र जनताका ज्वलन्त विषयहरुमा छलफल गर्न बैठक बस्नु पर्ने कांग्रेसले जनाएको छ ।
