बीरगन्ज, ११ माघ । प्रधानमन्त्री कप पुरूष राष्ट्रिय क्रिकेट प्रतियोगिताबाट सुदुरपश्चिम प्रदेशसँग पराजित भएसँग्र प्रदेश २ बाहिरिएको छ ।
कीर्तिपुरस्थित त्रिवि क्रिकेट मैदानमा टस हारेर पहिला ब्याटिंग गरेको प्रदेश २ ले निर्धारित ५० ओभरमा १ सय ९५ रनको योगफल तयार पारेको थियो । प्रदेश २ का हरिशंकर शाहले ७३ बलमा नौ चौकासहित ६० रन बनाए । विवेक यादवले ४१ रन बनाउँदा महबुब आलमले २३ रन जोडे ।
राहुलप्रताप सिंहले १२ रन बनाउँदा कुमार थापा ११ रनमा अविजित रहे । १ सय ९६ रनको लक्ष्य सुदूरपश्चिमले ३३ ओभरमा सात विकेट गुमाएर पूरा गरेपछि प्रतियोगितामा सान्त्वना जित हासिल गरेको छ ।
सुदूरपश्चिम यसअघि तीन खेलमा पराजित भएर प्रतियोगिताबाट बाहिरिसकेको थियो । लगातार तेस्रो खेलमा हारेको प्रदेश २ ले कुनै अंक जोड्न सकेको छैन ।
प्रदेश २ ले समूह ’बी’ को अन्तिम खेल नेपाल पुलिस क्लबसँग प्रतिस्पर्धा गर्नेछ । प्रतियोगितामा ३५ बलमा आठ चौका र दुई छक्का सहित ५७ रन बनाएका सुदुरपश्चिमका सञ्जु धामीलाई म्यान अफ दी म्याचको उपाधि दिइएको थियो ।