बीरगन्ज, ७ बैशाख – २० किलो चरेससहित दुई जना पक्राउ परेका छन् । नेपालबाट भारत तर्फ गइरहेको टेम्पोबाट भारतीय प्रहरीले २० किलो चरेससहित दुईजनालाई पक्राउ गरेको हो ।
पक्राउ पर्नेमा बीरगन्ज महानगरपालिका निवासी ३२ वर्षीय रामबाबु साह सोनार र बिहार पश्चिमी चम्पारणको पाली थानाका महामादी निवासी २१ वर्षीय धीरज कुमार मण्डल रहेका छन् ।
विशेष सूचनाको आधारमा बीरगन्जबाट रक्सौलतर्फ गइरहेको टेम्पोलाई रोकेर चेकजाँच गर्दा टेम्पोको विभिन्न स्थानमा लुकाई छिपाई राखिएको अवस्थामा उक्त मात्राको चरेस भारतीय प्रहरीले बरामद गरेको हो । भारतीय प्रहरीका अनुसार चरेसको मूल्य ३० लाख बराबर भएको जनाएको छ ।
पक्राउ परेका उनीहरुलाई नारकोटिक्स विभाग पटनाको जिम्मा लगाइएको भारतीय प्रहरीले जनाएको छ ।