काठमाडाै,०३ असार । स्वास्थ्य तथा जनसंख्यामन्त्री शेरबहादुर तामाङले यातायात श्रमिकहरूलाई कोरोनाविरुद्धको खोपको प्राथमिकतामा राखिने बताएका छन् ।
नेपाल यातायात स्वतन्त्र मजदुर संगठनका तर्फबाट प्रस्तुत गरेको माग मन्त्रालयमा बुझेपछि मन्त्री तामाङले यातायात श्रमिकहरू अत्यावश्यक सेवा क्षेत्रअन्तर्गत पर्ने बताउँदै खोप प्राथमिकतामा राखिने बताएका हुन् ।
मन्त्री तामाङले सडक सुरक्षा र स्वास्थ्यका बारेमा संगठन नेतृत्वसँग कुरा गर्दै सडक दुर्घटनाग्रस्त क्षेत्रहरूको पहिचान गरी हाईवे ट्रमा सेन्टरहरूको व्यवस्थापनमा सरकारको चासो रहेको बताएको संगठनका अध्यक्ष भीमज्वाला राईले जानकारी दिए ।
अध्यक्ष राईले ११ लाख यातायात श्रमिकहरूलाई खोपको माग गरिएको बताए । राईका अनुसार स्वास्थ्यमन्त्री तामाङले तत्काल इन्धन ढुवानी गर्ने ट्यांकर चालक तथा सहचालकहरूलाई खोप लगाइने बताएका थिए ।
ज्ञापनपत्रमा श्रमिकहरूलाई खोपको व्यवस्था, कोरोना संक्रमितहरूलाई निःशुल्क उपचार, मृतक श्रमिक परिवारलाई क्षतिपूर्ति र छोराछोरीहरूका लागि स्वास्थ्य र शिक्षाका लागि कोषको स्थापना, इन्धन तथा अत्यावश्यक खाद्यान्न ढुवानी श्रमिकहरूलाई जोखिमभत्ताको माग गरिएको अध्यक्ष राईले बताए ।