बीरगन्ज, २९ भदौ । सुरक्षित स्पर्श र असुरक्षित स्पर्श विषयक सचेत नामक कार्यक्रम सम्पन्न भएको छ । सामुदायिक संस्था सानो पाइलाको आयोजनामा बीरगन्ज २८, बगही स्थित महानन्द प्रसाद उपाध्याय माध्यमिक विद्यालयमा कार्यक्रम सम्पन्न भएको हो ।
कार्यक्रममा सुरक्षित र असुरक्षित स्पर्श बीचको भिन्नता र मानव जीवनमा यसले पार्न सक्ने प्रभावका विषयमा सहभागिहरुलाई सचेत गराइएको थियो ।
विभिन्न माध्यमबाट हुने यौनजन्य हिंसाका घटनाहरु बढ्दै गईरहेका कारण यसको पहिचान र यसबाट जोगिने उपायहरुका बारे विद्यार्थीहरुलाई जानकारी गराइएको जनाइएको छ । त्यस्तै किशोरावस्थामा आईपर्ने समस्याहरु, किशोरावस्था बारे जान्ने पर्ने कुराहरुका बारे पनि सहभागि विद्यार्थीहरुलाई जानकारी गराइएको संस्थाकी स्विटी चौरसियाले जानकारी गराईन् । उनका अनुसार किशोरावस्थामा आउन परिवर्तनका बारे जानकारी नहुँदा विद्यार्थीहरुलाई विभिन्न प्रकारका समस्याहरुको सामना गर्नु परिरहेको छ । वर्तमान पाठ्यक्रममा सुरक्षित स्पर्श र असुरक्षित स्पर्शका बारे यथेष्ट ज्ञान नहुँदा पनि विद्यार्थीहरु अनाहकमा यौनजन्य हिंसाको सिकार भईरहेको उनको भनाई छ ।
मंगलबार विद्यालयमै परिसरमा सम्पन्न कार्यक्रममा करिब ५५ जना विद्यार्थीहरुको सहभागिता रहेको थियो । सहभागिहरुलाई संस्थाकी चौरसियाले प्रशिक्षण दिएकी थिईन् । बाल दिवसको अवसर पारेर संस्थाले सुरु गरेको सचेत कार्यक्रम ५२ सातामा ५२ वटा विद्यालयमा सञ्चालन गर्ने लक्ष्य लिइएको छ ।
