बीरगन्ज, ३० असोज । बहुप्रतिक्षित नेपाली गीत म जुन तिमी तारा २ को म्युजिक भिडियो छायांकन सम्पन्न भएको छ । कोरोना र लकडाउनका कारण अवरुद्ध हुँदै आएको म्युजिक भिडियोको छायांकन अन्ततः सम्पन्न भएको हो ।
सन् २०१६ मा सार्वजनिक भएको म जुन तिमी ताराको व्यापक सफलता पछि गीतको दोस्रो भाग करिब ५ वर्ष पछि सार्वजनिक गर्न लागिएको हो ।
अनुप तिवारीको शब्द, संगीत र स्वर रहेको गीतको भिडियोलाई बिएस मेकर स्टुडियोले निर्माण गरेको छ । भिडियोमा युवराज केशरी र नम्रता अर्याल फिचरिंग छन् भने भिडियोलाई सावन शर्माले निर्देशन गरेका हुन् । भिडियोको क्यामेरा र सम्पादन भने विकास गुरुंगले सम्हालेका छन् ।
छायांकन सम्पन्न भई सम्पादनको चरणमा रहेको भिडियो केही सातामै सार्वजनिक गर्ने तयारी भईरहेको भिडियोका मोडेल केशरीले बताएका छन् । नेपाल पोष्ट डेलिसँगको कुराकानीमा उनले अभिनयको दृष्टिकोणबाट गीतलाई भिडियोमा पुर्ण न्याय गरिएको बताए । भिडियोको कथालाई दर्शकले मन पराउनेमा आफु विश्वस्त रहेको उनको भनाई छ ।
म जुन तिमी तारालाई यसका निर्माताहरुले लभ एन्थम (प्रेम गान)को संज्ञा दिन्छन् । भर्खरै प्रेममा परेका, प्रेममा रहेका र प्रेममा परिसकेकाहरुको अन्तरमनको हर्षलाई गीतले मुखरित पार्ने निर्माताहरुको जिकिर छ ।
