नेपाल राष्ट्र बैंकले चुच्चे नक्सा अंकित दुई रुपैयाँको नयाँ सिक्का शुक्रबारदेखि चलनचल्तीमा ल्याएको छ।
नेपाल राष्ट्र बैँकले साविककै आकार तथा सुनौलो रङ्गमा टकमरी गरिएको साल २०७७ लेखिएको दुई रुपैयाँको सिक्का चलनचल्तीमा ल्याएको छ ।
मुद्रा व्यवस्थापन विभागका अनुसार सिक्काको बीच भागमा सात प्रदेशसहितको नेपालको नक्सा रहेको छ।
सिक्काको अग्रभागमा वृत्ताकार घेराभित्र वरिपरि चौसठ्ठी वटा थोप्ला रहेका छन् । माथिल्लो भागमा अङ्ग्रेजीमा ‘आरएस टु’र तल्लो भागमा देवनागरी लिपिमा दुई रुपैयाँ लेखिएको छ ।
नक्साको ठिक माथिपट्टि दायाँतर्फ दृष्टिविहीनहरूले स्पर्श गरेर सिक्काको दर पहिचान गर्न सक्ने दुई वटा थोप्ला रहेको छ ।
विभागका अनुसार सिक्का पृष्ठ भागमा आठ थोप्लासहितको वृत्ताकार चित्र रही त्यसको भित्र वर्गाकार आकृतिको बाहिरिपट्टि वरिपरि चन्द्र, सूर्य, चक्र, शङ्ख, पद्म र गदाको आकृति रहेको छ ।
सिक्काको माथिल्लो भागमा देवनागरी लिपिमा नेपाल र तल्लो भागमा २०७७ लेखिएको छ।
