बीरगन्ज,०६ असाेज । बीरगन्ज महानगरपालिका– ३२ रामवनमा पर्सा प्राणी उद्यान (चिडियाघर)को शिलान्यास गरिएको छ। वन तथा वातावरणमन्त्री प्रदीप यादवले प्राणी उद्यान (चिडियाखाना)को शिलान्यास गरेका हुन्।
चिडियाखानाको शिलान्यास गर्दै मन्त्री यादवले एक अर्बभन्दा बढीको लागतमा चिडियाखाना स्थापना हुन लागेको बताए। चिडियाखाना पर्सा जिल्ला र समग्र मधेस प्रदेशको एक प्रमुख पर्यटकीयस्थल बन्ने उल्लेख गर्दै उनले यसले यहाँको विकास र समृद्धिका लागि पनि महत्वपूर्ण भूमिका खेल्ने विश्वास व्यक्त गरे।
चिडियाखाना बनेपछि काठमाडौं, पोखरा लगायत नेपालको विभिन्न कुनाका साथै भारतीय र विदेशी पर्यटक समेत वीरगञ्जमा आउने दावी वन मन्त्री यादवको छ ।
मन्त्री यादवले पर्सामा नै चिडियाखाना भईदिए हुन्थ्यो भन्ने बाल्यकालको कल्पना पुरा गर्ने अवसर मिलेको बताए ।
‘एसएलसी पछि काठमाडौं घुम्न गएका थियौं, टिकट काटेर जाउलाखेलको चिडियाखाना भित्र पस्यौं । त्यहि बेला वीरगञ्जमा पनि चिडियाखना भइदिए हुन्थ्यो भन्ने कल्पना गरेको थिए । आज आफैंले शिलान्यास गर्ने अवसर मिल्यो’, मन्त्री यादवले भने ।
उनले मन्त्री बनेदेखि आफूले घोषणा गरेअनुसार प्रदेशकै पहिलो चिडियाखाना (पर्सा प्राणी उद्यान) स्थापना गरेको बताए।
