काठमाडौं । पछिल्लो समय डिजिटल (अनलाइन) वित्तीय कारोबार तीव्र गतिमा बढिरहेको छ ।
भुक्तानीका सधान मोबाइल बैंकिङ, इन्टरनेट बैंकिङसँगै विविध भुक्तानीका साधनहरू वालेट, कनेक्ट आइपीएस, डेबिट, क्रेडिट कार्डको प्रयोग बढेको हो ।
नेपाल राष्ट्र बैंकका अनुसार पुसमसान्तसम्ममा मोबाइल बैंकिङ सुविधा प्रयोगकर्ताहरुको संख्या २ करोड क्रस भएको छ । यस्तै, इन्टरनेट बैंकिङ प्रयोगकर्ताहरुको संख्या १७ लाख ६८ हजार पुगेको छ भने डेबिट कार्ड प्रयोगकर्ताको संख्या १ करोड २२ लाख २२ हजार र क्रेडिट कार्ड प्रयोगकर्ताहरुको संख्या २ लाख ७६ हजार पुगेको बैंकले जनाएको छ ।
यस्तै विविध वालेट प्रयोगकर्ताहरुको संख्या १ करोड ५९ लाख ६२ हजार पुग्दा भुक्तानीको साधन कनेक्ट आइपीएस प्रयोगकर्ताहरुको संख्या ९ लाख ९४ हजारमाथि रहेको बैंकले जनाएको छ ।
समीक्षा अवधिमा मोबाइल बैंकिङबाट १ खर्ब ६७ अर्ब ८० करोड रुपैयाँ बराबरको ट्रान्जेक्सन भएको छ भने इन्टरनेट बैंकिङमार्फत १२ अर्ब २९ करोड रुपैयाँ, डेबिट कार्डमार्फत ८१ अर्ब १० करोड रुपैयाँ, क्रेडिट कार्डमार्फत १ अर्ब ५३ करोड रुपैयाँ र कनेक्ट आइपीएसमार्फत अधिकतम ३ खर्ब ४३ अर्ब ३१ करोड रुपैयाँ बराबरको भुक्तानी भएको बैंकले जनाएको छ ।
