रौतहट,३० वैशाख । रौतहटमा प्रहरीले भारतबाट तस्करी गरी ल्याएको एक हजार बोरा रासायनिक मल बरामद गरेको छ । शुक्रबार जिल्ला प्रहरी कार्यालय रौतहट र इलाका प्रहरी कार्यालय राजपुरबाट खटिएको प्रहरीको संयुक्त टोलीले रासयनिक मल बरामद गरेको हो । मल बरामदका क्रममा प्रहरीले चार राउन्ड हवाई फायर समेत गरेको थियो ।
भारतीय सीमानासँग जोडिएको राजपुर नगरपालिका–५ स्थित स्कुल चोकमा रहेको रुद्रा साह र साजन साहको घरमा लुकाएर राखिएको रासायनिक मल बरामद गरिएको रौतहट प्रहरी प्रमूख एसपी वीरबहादुर बुढामगरले बताएका छन्। मल बरामद गर्दा पाँच राउन्ड गोली चलाउनुपरेको उनले बताए ।
मल बरामदका क्रममा तस्कर र स्थानीयबासीले अवरोध गर्न खोजेका थिए । सोहीबेला एकसय भन्दा बढी सुरक्षाकर्मी परिचालन गरी युरिया तथा डीएपी मल बरामद गरिएको एसपी बुढामगरले बताए। सो क्रममा प्रहरीले मल तस्करी गरेको आरोपमा रुद्रा साह र कन्हैया साहलाई नियन्त्रणमा लिएको छ।