काठमाडौं,१ असाेज- नेपाली कांग्रेसले असोज ४ गते केन्द्रीय समिति बैठक बोलाएको छ । त्यसको ठीक दुई दिन अगाडि अथार्त असोज २ गते नै नेता डा. शेखर कोइरालाले आफ्नो समूहको बैठक बोलाएका छन् ।
बालुवाटारस्थित सम्पर्क कार्यालयमा कोइरालाले बोलाएको बैठकमा महामन्त्री विश्वप्रकाश शर्मा र युवा नेता प्रदीप पौडेललाई पनि निम्तो गरिएको छ । अर्का महामन्त्री गगन थापालाई पनि संस्थापन इतर अर्थात् शेखर समूहकै नेता मान्ने गरिएको छ ।
पछिल्लो समय सरकार परिवर्तन गर्नुपर्ने पक्षमा धारणा राख्दै आएका कोइरालाले केन्द्रीय समिति बैठक अगाडि समूहको बैठक बैठक बोलाउनु र आफ्नो समूहमा नरहेका नेताहरूलाई बोलाउनुलाई अर्थपूर्ण मानिएको छ ।
स्रोतका अनुसार यस पटकको केन्द्रीय समिति बैठकमा शेखर समूहले सरकार परिवर्तनको विषय जोडतोडका साथ उठाउने बुझिएको छ । ‘कांग्रेसले नै सरकारको नेतृत्व नगरेसम्म देशले निकास पाउन नसक्ने’ बताउँदै आएका कोइराला पछिल्लो समय पार्टीभित्र सरकार विरुद्धको समूह बढाउने खेलमा लागेका हुन् ।
जसरी पनि आफ्नै पार्टी सहभागी पुष्पकमल दाहाल ‘प्रचण्ड’ नेतृत्व ढाल्ने खेलमा लागेका कोइरालाले सरकार विरुद्धको मोर्चा बलियो बनाउन विश्वप्रकाश र प्रदीपको साथ खोजेका हुन् । यद्यपि, शर्मा र पौडेल भने अहिले नै सरकार परिवर्तन गर्न नहुने पक्षमा छन् ।
त्यसो त कांग्रेस सभापति शेरबहादुर देउवा पनि प्रचण्ड सरकारसँग सन्तुष्ट छैनन् । विशेष गरी सरकारको भ्रष्टाचार विरुद्धको अभियानका क्रममा आफ्नै नेताहरू पक्राउ पर्न थालेका कारण देउवाले प्रचण्ड सरकारसँग असुरक्षित ठानेका हुन् ।
सभापति देउवा प्रधानमन्त्री प्रचण्ड र गृहमन्त्री नारायणकाजी श्रेष्ठसँग असन्तुष्ट र त्रसित रहेको मौका छोपेर कोइराला सरकार नै परिवर्तन गर्ने खेलमा लागेका हुन् । तर, देउवा भने अहिले नै सरकार परिवर्तन गर्नुपर्छ भन्ने पक्षमा छैनन् ।
