वीरगंज। एमालेको मधेस प्रदेशको अधिवेशन तयारी तीव्र पारिएको छ । असोज २४ गतेदेखि जनकपुरमा हुने सो अधिवेशनका लागि विभिन्न समिति र उपसमितिहरू बनाएर तयारी तीव्र पारिएको एमाले मधेस प्रदेश कमिटीले जनाएको छ ।
अधिवेशनका लागि १५० स्वयंसेवक र ५० जना पर्यवेक्षक खटाइने तयारी भइरहेको छ । प्रदेश अध्यक्ष राम अवतार यादवको संयोजकत्वमा प्रतिनिधि छनोट तथा व्यवस्थापन समिति गरिएको छ भने प्रदेश उपाध्यक्ष रेवती पन्तको संयोजकत्वमा जनपरिचालन समिति गठन गरिएको बताइएको छ ।
कमलकिशोर चौधरीको संयोजकत्वमा स्वयंसेवक परिचालन समिति, शिवशंकर साहको संयोजकत्वमा भोजन व्यवस्थापन समिति, मोहम्मद कायस्थको संयोजकत्वमा आवास व्यवस्थापन समिति गठन गरिएको छ ।
जनकपुरको महेन्द्रनारायण निधि प्रतिष्ठानमा हुने अधिवेशनको उद्घाटन एकालेका अध्यक्ष केपी शर्मा ओलीले गर्ने तय भएको छ । असोज २४ गतेदेखि २६ गतेसम्म हुने सो अधिवेशनका लागि प्रतिनिधिको पनि अन्तिम रूप दिने काम भइरहेको बताइएको छ । मधेस प्रदेशका आठ वटै जिल्लामा रहेको करिब ६० हजार सक्रिय सदस्य मध्येबाट एक हजार अधिवेशन प्रतिनिधि छनोट गरिने छ । असोज १३ गते मधेस प्रदेशको १३६ वटै पालिकामा मनोनयन दर्ताको कार्यक्रम राखेको छ ।
अधिवेशनबाट महिला, दलित, आदिवासी जनजाति, युवासहितका क्लस्टर र विभिन्न जनवर्गीय संगठनबाट प्रतिनिधित्व हुने गरी २३५ सदस्यीय प्रदेश कमिटी चयन गरिनेछ ।
