बीरगन्ज,०८ चैत । बीरगन्जमा अखाद्य बस्तु बेचबिखन गरेको आरोपमा स्थानीय प्रशासनले एक उद्योगमा सिलबन्दी गरेको छ । बीरगन्ज महानगरपालिका ६ मा रहेको पूजा सामाग्री प्रोड्क्ट उद्योगमा जिल्ला प्रशासन कार्यालय पर्सा र नाप तौल विभागको संयुक्त टोलीले सिलबन्दी गरेको हो ।
सो उद्योगले विभिन्न ब्रान्ड राखेर नक्कली घ्यू तथा पाउडर बेचबिखन गरेको आरोप स्थानीय प्रशासनले लगाएको छ । उद्योगमा छापा मार्दा धेरै परिमाणमा पाउडरको दूध र नक्कली घ्यू उत्पादन भइरहेको पाइएको पर्साका प्रमुख जिल्ला अधिकारी दिनेश सागर भुसालले बताए ।
उनका अनुसार उद्योगले आफैँ उत्पादन गरेको डाल्डा घ्यूलाई विभिन्न ब्रान्डको नाम दिएर बजारमा बेचबिखन गरिरहेको पाइएको छ । उद्योगले उत्पादन गर्ने नक्कली घ्यू खास गरी नारायणी, पूजा, गोदावरी, स्वदेशी सहितका नामबाट बिक्री गर्दै आएको पाइएको प्रमुख जिल्ला अधिकारी भुसालले बताए ।
