पढन गएका बालबालिकालाई घर निर्माणको काममा लगाउँदा पर्सामा एक नाबालक विद्यार्थी घाइते भएका छन् । सखुवा प्रसौनी गाउँपालिका वडा नं. ५ महुवनमा रहेको श्री राम जानकी इंगलिश बोर्डिङ स्कुलको लापरवाहीले सोही स्कुलको कक्षा एलकेजीमा अध्ययनरत ७ वर्षीय विद्यार्थी अनुप गोढ घाइते भएका हुन् ।
सखुवा प्रसौनी गाउँपालिका वडा नं. ५ महुवन निवासी घाइते बालक अनुपको बाराको परवानीपुर गाउँपालिका वडा नं. ५ स्थित एलएस न्युरो एण्ड जेनरल होस्पिटलमा उपचार भइरहेको छ । गम्भीर घाइते अनुपको टाउकोमा २८ वटा टांका लागेको हस्पिटलले जनाएको छ ।
स्कुलमा पढन गएका आफ्नो छोरालाई सखुवा प्रसौनी गाउँपालिका वडा नं. ५ महुनवन निवासी नै विद्यालयकी संचालिका भगवन्ती कलवारले घर निर्माणको काममा लगाएपछि फलाममा लडेर घाइते भएको चन्दन साह गोढले वताए ।
विद्यार्थीको उमेरको ख्याल नगरी विद्यालय नजिक निर्माण भइरहेको घरमा ज्यालादारीको काममा लगाउँदा आफ्नो छोरा घाइते भएको उनको भनाई छ ।
उनले कलवारको लापरवाहीले विद्यालयमा पढन गएका आफ्नो छोरा घाइते भएकोले कारबाईको माग गर्दै बुधवार इलाका प्रहरी कार्यालय पोखरियामा उजूरी समेत दिएका छन् ।
उनका अनुसार स्कुल नजिकै विद्यालय संचालिकका कलवारले आफ्नो पक्की घर निर्माणमा स्कुलका विद्यार्थीहरू समेतबाट निर्माण सामाग्री ढुवानी आदि विभिन्न ज्यालादारीको काम गराउँदै आएकी थिइन । यस अघि विद्यालयमा पढन गएका बालबालिकालाई काममा नलगाउँन अभिभावकले भन्दा उनले अटेरी गर्दै आएकी थिइन ।
विद्यालयकी संचालिका कलवारले निर्माण भइरहेको विद्यालय भवनको भित्ता खसेर बालक घाइते भएको वताइन । उनले कुनै पनि बालबालिकालाई आफुले भवन निर्माणको काममा नलगाएको वताइन । उनले भवन निर्माण भइरहेको ठाउँमा होली मनाउन तयारी गर्न गएका ठुलाठुला विद्यार्थीहरूसंगै गएका अनुप समेत भित्तामा लडेर घाइते भएको वताइन । घाइते भएको दिनदेखि नै आफुले अनुपको उपचार समेत गराउँदै आएको विद्यालयकी संचालिक कलवारले जानकारी गराइन ।
पीडितले बुधवार मात्र जाहेरी दिएकोले घटना वारे अनुसन्धान भइरहेको इलाका प्रहरी कार्यालय पोखरियाका प्रहरी निरीक्ष्क मोहन बिक्रम केसीले वताए ।
