मनाङ,१८ वैशाख । मनाङमा लुलुगाई मारेको आरोपमा ३ जनालाई प्रहरीले नियन्त्रणमा लिएको छ । ङिस्याङ गाउँपालिका ६ माथिल्लो मनाङ गाउँबाट उनीहरुलाई पक्राउ गरिएको जिल्ला प्रहर िकार्यालय मनाङले जनाएको छ ।
प्रमुख एवं प्रहरी नायब उपरीक्षक नरेशकुमार सिंहका अनुसार लुलुगाई हतया आरोपमा निजहरुलाई नियन्त्रणमा लिइएको हो ।
प्रहरी नायब उपरीक्षक सिंहका अनुसार डोल्पाको काकोट गाउँपालिका ९ का ५० वर्षीया धोर्जे गुरुङ, गोरखाको आरुघाट गाउँपालिका १ का ३५ वर्षीया सोमबहादुर गुरुङ र ५८ वर्षीया माहिला गुरुङलाई नियन्त्रणमा लिइएको छ । उनीहरु ङिस्याङमा ज्याला मजदुरी गर्दै आएका छन् ।
उनीहरुले आइतबार साँझ डिस्याङ-६ माथिल्लो मनाङमा ढुक्टा गुरुङको लुलु प्रजातिको गाईलाई कामीबहादुर गुरुङको घरमा लगेर मासु खाने प्रयोजनका लागि हत्या गरेको जानकारी आएपछि खटिएको प्रहरी टोलीले पक्राउ गरेको प्रहरी नायब उपरीक्षक सिंहले बताए।
उनले भने, “जिल्ला अदालतबाट म्याद थप अनुमति लिई आवश्यक कारबाही गरिनेछ ।” लुलुगाई लोपोन्मुख अवस्थामा रहेको छ ।
