११ जेठ, काठमाडौं । एम्नेस्टी इन्टरनेसनलका महासचिव डा आग्नेस कालामारले मानवअधिकारका आधारभूत विषयमा कसैसँग कुनै सम्झौता हुन नसक्ने बताएकी छन् ।
भ्रमणका क्रममा नेपाल आइपुगेकी महासचिव डा कालामारले आज एम्नेष्टी इन्टरनेशनल नेपालले राजधानीमा आयोजना गरेको कार्यक्रममा लोकतन्त्र, मानव अधिकार र प्रेस स्वतन्त्रताको रक्षाका लागि विश्वव्यापी रुपमा एम्नेष्टीले काम गर्दै आएको बताइन् । उनले आज बिहान प्रधानमन्त्री तथा विभिन्न राजनीतिक दलका शीर्ष नेताहरूसँग भेट गरेको जानकारी गराउँदै नेपालको सङ्क्रमणकालीन न्यायका विषयमा नेताहरूसँग एम्नेष्टीको सरोकार राखेको बताइन् ।
महासचिव डा कालामारले यही जेठ ३ गते श्रीलङ्काबाट दक्षिण एसियाको भ्रमण सुरु गरेकी थिइन् । श्रीलङ्कामा उनले गृह युद्धमा जीवन गुमाएका हजारौं नागरिकको सम्झनामा जेठ ५ गते मुल्लिभाइक्कलमा आयोजना गरिएको स्मृति कार्यक्रममा सहभागिता जनाएकी थिइन् ।
दक्षिण एसियाको भ्रमणका क्रममा उनले मानवअधिकार र अन्तर्राष्ट्रिय कानुनमा देखिएको विश्वव्यापी खतरा, दक्षिण एसियाको मानवअधिकार अवस्था, जलवायु परिवर्तन र मानवअधिकारमा यसको प्रभाव, मानवअधिकारका सवालमा सरकारको दोहोरो मापदण्ड, ऐतिहासिक चुनावी वर्षमा आर्टिफिसियल इन्टेलिजेन्सको नियमन र व्यवस्थापन, बिग टेक कम्पनीको जवाफदेहिता लगायत विषयमा जानकारी लिएकी थिइन् ।
