काठमाडौँ,०३ असार । पूर्वराष्ट्रपति विद्यादेवी भण्डारीको चीन भ्रमण तत्कालका लागि स्थगित भएको छ। असार महिनाभित्र चीन जाने गरी तयारी अघि बढे पनि भण्डारीको भ्रमण तत्कालका लागि रोकिएको एमाले स्रोतले बताए ।
एमालेको पार्टी सदस्यता नवीकरण गरेकी भण्डारी अध्यक्ष केपी शर्मा ओलीको असहमतिका बाबजुद चीन जाने तय भएको थियो। प्रधानमन्त्री पुष्पकमल दाहाल प्रचण्डको पछिल्लो भारत भ्रमणपछि एमालेको सक्रिय राजनीतिमा फर्किने तयारीमा रहेकी भण्डारीको चीन भ्रमण स्थगित भएको हो।
प्रधानमन्त्री दाहाल जेठ २७ गते भारतीय समकक्षी नरेन्द्र दामोदरदास मोदीको तेस्रो कार्यकालको शपथग्रहण समारोहमा सहभागी हुन गएका थिए। शपथ ग्रमणमा जाँदा उनले मोदीसँग औपचारिक भेटवार्ता गरेका थिए।
स्रोतका अनुसार भण्डारीले स्वास्थ्यका कारण तत्काल भ्रमणमा आउन नसक्ने खबर चिनियाँ पक्षलाई दिएकी छन्। उनको भ्रमणलाई सरकार र एमालेले गोप्य राख्ने प्रयास गर्दै आएको छ।
चीनले उनलाई पूर्वराष्ट्रपतिको रुपमा भन्दा पनि एमाले नेत्रीका रुपमा स्वागत सत्कार गर्ने तयारी अघि बढाएको थियो।
२०७२ मा राष्ट्रपति हुनुअघि एमालेको उपाध्यक्ष रहेकी भण्डारी त्यसपछि पार्टीसँगको औपचारिक सम्बन्धमा थिइनन्। तर, उनले वैशाख १ गते पार्टीको सदस्यता नवीकरण गरेर सक्रिय राजनीतिकमा आउने ढोका खोलिकी छन्। कतिपयले उनको यो कदम पदीय मर्यादा विपरीत रहेको भनेका छन्।
