वीरगन्ज, १४ साउन । वीरगन्ज महानगरपालिकाले सिरीसिया नदीमा लेदोसहितको फोहोर पानी निकास गरेर नदीलाई प्रदूषित बनाउने उद्योगहरूमाथि कडा कारवाही गरेको छ । महानगरपालिका नगर प्रहरीसहित कर्मचारीको टोलीले सोमबार वीरगन्ज–२१ परवानीपुरस्थित अर्निका प्रोसेसिङ उद्योग प्रालि र श्रीसिद्धि टेक्सटाइल्स प्रालिमा २० ट्याक्टर फोहोर लगेर उद्योगभित्रको परिसरमा थुपारि दिएको हो ।
यसअघि आइतबारपनि महानगरको टोललीले अरनीको टेक्सटाइल, सिद्धि टेक्सटाइल, र मरियम लेदरजस्ता उद्योगहरूले वातावरणीय मापदण्डहरूको उल्लङ्घन गर्दै नदीमा सीधा फोहर पानी निकास गरेपछि महानगरपालिकाले उद्योगको गेटमै फोहोर थुपारेको हो ।
हिजो, महानगरपालिकाले अरनीको टेक्सटाइल र सिद्धि टेक्सटाइलको गेटमा ३/३ ट्याक्टर फोहोर थुपारेको थियो । आज भने यो मात्रालाई बढाएर १०/१० ट्याक्टर फोहोर थुपारिएको छ । महानगरले यस्तै कारवाही मरियम लेदर उद्योगमाथि पनि लागू गरेको छ ।
सिरीसिया नदीमा लेदोसहितको फोहोर पानी प्रवाहले नदीको पानी अत्यन्तै दूषित भई त्यसको पारिस्थितिकी प्रणालीमा गम्भीर असर पारेको छ । यसरी उद्योगहरूले नगरको वातावरण र नागरिकको स्वास्थ्यलाई ठूलो जोखिममा राखेको भन्दै महानगरपालिकाले उद्योगहरूको गेटमा फोहोर थुपारीदिएको हो ।
