वीरगन्ज,०७ भदाै । गृहमन्त्री रमेश लेखकले वर्तमान सरकार मुलुकमा स्थिरता, सुशासन, दिगो शान्ति, समृद्धि, र विकासको लागि बनेको बताएका छन्। शुक्रबार बिहान जिल्ला प्रशासन कार्यालय धनुषाको नयाँ भवनको शिलान्यास गर्दै गृहमन्त्री लेखकले सरकारको मुख्य उद्देश्य मुलुकमा राजनीतिक स्थिरता कायम गर्नु रहेको स्पष्ट पारे।
उनले पछिल्लो डेढ वर्षमा मुलुकमा देखिएको राजनीतिक अस्थिरताले आम नागरिकमा निराशा पैदा गरेको र यसलाई चिर्न वर्तमान सरकार सफल हुने विश्वास व्यक्त गरे। गृहमन्त्री लेखकले अस्थिरताको कारण सेवा प्रवाहमा प्रत्यक्ष असर परेको, विकास निर्माणका कामहरूमा गति आउन नसकेको, अर्थतन्त्रमा शिथिलता उत्पन्न भएको, र भ्रष्टाचार नियन्त्रणमा जटिलता देखिएको बताए।
लेखकले भने, “अहिले मुलुकमा दुई ठूला राजनीतिक दलहरू मिलेर नयाँ राजनीतिक समीकरण बनेको छ। यो समीकरण मुलुकमा स्थिरता, सुशासन, र दिगो शान्तिका लागि बनेको हो। यसलाई सफल बनाउनुको विकल्प छैन।”

उनले गठबन्धन भत्काउने र बनाउने प्रक्रियाले देशको विकास र जनताको सेवामा असर गरेको उल्लेख गर्दै, अबको समीकरणलाई निरन्तरता दिनुपर्नेमा जोड दिए।
गृहमन्त्रीले जनतामा रहेको निराशालाई आशामा बदल्न र मुलुकमा दीर्घकालीन शान्ति र समृद्धि ल्याउन सरकार प्रतिबद्ध रहेको बताए।