जल तथा मौसम पूर्वानुमान महाशाखाका अनुसार देशभर मौसममा पश्चिमी वायु, स्थानीय वायु, र बंगलादेश तथा भारतको आसाम क्षेत्रको न्यूनचापीय प्रणालीको आंशिक प्रभाव देखिएको छ। यस प्रभावले शनिबार बिहान कोशी, बागमती, कर्णाली, र सुदूरपश्चिम प्रदेशसहित पहाडी क्षेत्रमा आंशिकदेखि सामान्य बदली रहँदा अन्य भू-भागमा आंशिक बदलीदेखि मुख्यतया सफा मौसम रहनेछ।
शनिबार दिउँसो कोशी र बागमती प्रदेशलगायत देशका पहाडी क्षेत्रमा पनि आंशिकदेखि सामान्य बदली रहने, भने अन्य क्षेत्रमा आंशिक बदलीदेखि सफा मौसम रहने पूर्वानुमान गरिएको छ। दिउँसो कोशी, बागमती, र गण्डकी प्रदेशका केही पहाडी क्षेत्रका थोरै स्थानहरूमा चट्याङ्गसहित हल्का वर्षा हुन सक्ने सम्भावना रहेको छ।
कोशी, बागमती, र गण्डकी प्रदेशका उच्च पहाडी र हिमाली क्षेत्रका एक-दुई स्थानमा हल्का हिमपातको सम्भावना पनि महाशाखाले जनाएको छ।
राति पनि पहाडी क्षेत्रमा आंशिकदेखि साधारणतया बदली रहँदा अन्य क्षेत्रमा आंशिक बदलीका साथ सफा मौसम रहनेछ। कोशी, बागमती, र गण्डकी प्रदेशका पहाडी क्षेत्रका केही स्थानमा हल्का वर्षा र उच्च पहाडी तथा हिमाली भू-भागमा हल्का हिमपात हुने सम्भावना रहेको जानकारी महाशाखाले दिएको छ।
