वीरगञ्ज, १७ कात्तिक । नेपाल सरकारका खानेपानी मन्त्री प्रदीप यादव र वीरगञ्ज महानगरपालिका मेयर राजेशमान सिंहले वीरगञ्ज कारागारको निरीक्षण गर्दै त्यहाँ रहेका कैदी बन्दीहरूको जीवनस्तर, भौतिक सुविधा र उनीहरूले भोगिरहेका समस्याहरूको प्रत्यक्ष जानकारी लिनुभएको छ ।
शनिवार बिहानै कारागारको अनुगमन गर्न पुग्नुभएका मन्त्री यादवले कैदीहरूसँग संवाद गर्दै, उहाँहरूले सामना गरिरहेका कठिनाइहरूबारे सुन्नुका साथै तुरुन्तै सुधारका लागि पहल गर्ने वाचा गर्नुभयो ।
कैदीहरूले कारागारमा शौचालयको अभाव, विद्युत् आपूर्तिमा असुविधा, खानेपानीको कमी, र महिला कैदीहरूको लागि जीर्ण भवनको अवस्था जस्ता समस्या राख्नुभएको थियो । महिला कैदीहरूले आफ्नो बसोबास स्थान असुरक्षित र अस्वास्थ्यकर रहेको गुनासो गर्दै स्वास्थ्य तथा सरसफाइका आधारभूत सुविधाहरू सुधार गर्न आग्रह गर्नुभयो ।
मन्त्री यादवले कैदीहरूको गुनासोलाई गम्भीरतापूर्वक लिनुहुँदै भन्नुभयो, “कारागारमा रहेका प्रत्येक व्यक्तिले आधारभूत सुविधा पाउनु पर्छ । विशेष गरी महिला कैदीहरूको लागि शौचालय, बसोबास, र खानेपानीको उचित व्यवस्थापन प्राथमिकताका साथ गरिनेछ । यसका लागि सरोकारवाला निकायहरूसँग आवश्यक छलफल गरी शीघ्र सुधारात्मक कदम चाल्नेछौँ ।” उहाँले महिला कैदीहरूको सुविधामा विशेष ध्यान दिई कारागारको पूर्वाधार र व्यवस्थापन सुधार गर्न निर्देशन पनि दिनुभयो ।
अनुगमन कार्यक्रममा सहभागी वीरगञ्ज महानगरपालिकाका मेयर राजेशमान सिंहले कारागार सुधारमा महानगरले पूर्ण सहयोग गर्ने प्रतिबद्धता व्यक्त गर्दै भन्नुभयो, “महानगरपालिकाले महिला कैदीहरूको स्वास्थ्य, सरसफाइ, र अन्य आधारभूत आवश्यकताहरू पूरा गर्न तत्पर छ । महिला कैदीहरूलाई सुरक्षित र सम्मानजनक वातावरण दिन स्थानीय तहले राज्यका अन्य निकायहरूसँग सहकार्य गर्नेछ ।”
सिंहले विशेष गरी महिला कैदीहरूको जीर्ण अवस्थालाई सुधार गर्न महानगरको तर्फबाट आवश्यक सहयोग उपलब्ध गराइने बताउनुभयो ।
पर्सा प्रहरीका प्रमुख एसपी कुमोद ढुङ्गेलले पनि कैदीहरूको अवस्थाबारे चिन्ता व्यक्त गर्दै भन्नुभयो, “प्रहरीको जिम्मेवारी केवल सुरक्षा सुनिश्चित गर्नु मात्र होइन; मानव अधिकारको प्रत्याभूति गराउँदै कैदीहरूको जीवनमा पनि सकारात्मक प्रभाव पार्नु हो । महिला कैदीहरूको स्वास्थ्य र स्वच्छताका सवालमा प्रहरीको भूमिका सशक्त हुनेछ ।” ढुङ्गेलले कारागारमा सुरक्षित र सम्मानजनक वातावरण निर्माणका लागि प्रहरीको सहयोग निरन्तर जारी रहने प्रतिबद्धता व्यक्त गर्नुभयो ।
मन्त्री यादवको यो निरीक्षणले कारागार सुधारको दिशामा ठोस कदम चालिने विश्वास दिलाएको छ । स्थानीय निकाय र प्रहरी प्रशासनसँगको सहकार्यले महिला कैदीहरूको लागि सुरक्षित र स्वस्थ वातावरणको प्रत्याभूति दिलाउन सकिनेछ । मन्त्री यादवले आफ्नो टोलीसँग परामर्श गरेर यस क्षेत्रको सुधारका लागि शीघ्र काम सुरु गरिने बताउनुभयो ।
