वीरगंज – आगामी महिनामा हुने यु-१९ एशिया कपका लागि नेपाल क्रिकेट संघ (क्यान) ले हेमन्त धामीको कप्तानीमा १८ सदस्यीय नेपाली क्रिकेट टिमको घोषणा गरेको छ। विशेष चर्चा बटुलेका खेलाडी हुन् वीरगंज महानगरपालिका वडा नम्बर १२, मुर्ली निवासी १७ वर्षीय रन्जित कुमार, जसको छनोटले वीरगंज र आसपासका क्षेत्रका क्रिकेटप्रेमीहरूमा उत्साह थपेको छ।
रन्जित यसअघि नेपाल ‘ए’ टिमबाट खेलिसकेका छन्, जसले उनको प्रतिभा र खेलप्रतिको प्रतिबद्धतालाई प्रमाणित गरेको छ। क्यानको यो छनोटले वीरगंजका युवा खेलाडीहरूको राष्ट्रिय स्तरमा उपस्थिति बलियो बनाउने अपेक्षा गरिएको छ।
रन्जितको छनोटलाई पर्सा जिल्ला क्रिकेट संघका प्रशिक्षक जहुर अन्सरीले पनि सकारात्मक दृष्टिकोणले हेरिरहेका छन्। उनका अनुसार, रन्जितको सफलता वीरगंज र पर्साका अन्य खेलाडीहरूको लागि प्रेरणादायी छ र यसले पर्साको खेलाडीलाई थप उर्जा मिल्ने बताए साथै रन्जितले नेपाल ‘ए’ टिमबाट उत्कृष्ट प्रदर्शन गरेर आफ्नो क्षमता प्रमाणित गरिसकेको उनले बताए ।
टीममा उपकप्तानको भूमिका अर्जुन कुमालले पाएका छन्, भने मुख्य प्रशिक्षकको जिम्मेवारी शक्ति गौचनलाई दिइएको छ। नेपालले यु-१९ एशिया कपको पहिलो खेल मंसिर १४ गते श्रीलंकासँग खेल्नेछ, त्यसपछि मंसिर १६ मा बंगलादेश र मंसिर १८ मा अफगानिस्तानसँग प्रतिस्पर्धा गर्नेछ।
नेपाली टिमका सदस्यहरू:
हेमन्त धामी (कप्तान), अर्जुन कुमाल (उपकप्तान), आकाश त्रिपाठी, उत्तम थापा, मयन यादव, नरेन साउद, युनिस विक्रम सिंह ठकुरी, नरेन भट्ट, सन्तोष यादव, युवराज खत्री, रोशन विक, विपिन महतो, राजेश यादव, दयानन्द मण्डल, अपराजित पौडेल, अभिषेक तिवारी, दिलसाद अली, र वीरगंजका रन्जित कुमार।
रन्जितको यो अवसरले पर्साका युवा खेलाडीहरूलाई प्रेरणा दिनेछ र यस क्षेत्रमा क्रिकेट विकासको नयाँ अध्याय सुरु गर्ने अपेक्षा गरिएको छ।
