काठमाडौं, १७ पुस । भारतले भियतनामसमक्ष चालकरहित हवाइ उपकरण ड्रोन प्रतिरोधी प्रणाली बिक्री गर्ने प्रस्ताव गरेको छ ।
भारतले भियतनामी जनसेनाको वायुसेनालाई अत्याधुनिक ड्रोन प्रतिरोधी प्रणाली बिक्रीको प्रस्ताव गरेको हो । पछिल्लो समय विश्वका विभिन्न क्षेत्रमा जारी युद्धमा ड्रोनको प्रयोग बढिरहेको बेला भारतले भियतनामलाई दुई किसिमको प्रणाली बिक्रीको प्रस्ताव गरेको हो ।
इण्डियन डिफेन्स रिसर्च विङका अनुसार भारतले भियतनामलाई ‘हार्ड किल’ र ‘सफ्ट किल’ प्रविधिमा आधारित ड्रोन प्रतिरोधी प्रणाली खरिद गर्न प्रस्ताव गरेको छ । ‘हार्ड किल’ प्रणालीले क्षेप्यास्त्र वा लेजर प्रविधिका माध्यमबाट आकाशमा उडिरहेको ड्रोनलाई भौतिक रुपमा नष्ट पार्ने गर्छ ।
भारतीय रक्षा अनुसन्धान तथा विकास संगठन डीआरडीओले डी–४ जस्ता प्रणालीको विकास गरेको छ । डी–४ प्रणाली लेजर प्रविधिमा आधारित रहेको जनाइएको छ ।
त्यस्तै, ‘सफ्ट किल’ प्रणालीले भौतिक रुपमा नष्ट गर्ने नभइ रेडियो आवृत्ति, जीपीएस र सिग्नल जाम गरी ड्रोनलाई निस्तेज पार्ने काम गर्छ ।
