काठमाडौं,०७ माघ । भारतीय योग गुरु बाबा रामदेव र पतञ्जली योग पीठका प्रमुख आचार्य बालकृष्णविरुद्ध भारतमा औषधि ऐन उल्लंघनको आरोपमा पक्राउ पुर्जी जारी गरिएको छ।
केरलाको औषधि नियन्त्रण विभागले औषधि ऐन, १९५४ अन्तर्गत कानूनी प्रावधान उल्लंघन गरेको आरोपमा उनीहरूविरुद्ध यो कदम चालेको हो।
भारतीय सञ्चारमाध्यमका अनुसार अदालतले रामदेवलाई सुनुवाइको लागि उपस्थित हुन भने पनि उनले समयमै उपस्थिति जनाएनन्। यसै कारण अदालतले पक्राउ पुर्जी जारी गर्न निर्देशन दिएको हो।
पतञ्जली योग पीठको नाममा उत्पादन गरिएका केही औषधिहरू कानूनी मापदण्ड विपरीत रहेको भन्दै औषधि नियन्त्रण विभागले छानबिन अघि बढाएको थियो।
दुवै योग गुरुमाथि औषधि ऐन उल्लंघन गर्दै गलत सूचनाका आधारमा उत्पादन र प्रचार गरेको आरोप लगाइएको छ।