काठमाडौं,०७ माघ । नेपाल राष्ट्र बैंकका गभर्नर महाप्रसाद अधिकारीले समग्र अर्थतन्त्रका सूचक सकारात्मक रहे पनि बैंकिङ क्षेत्रमा देखिएका अराजक गतिविधिका कारण अर्थतन्त्रमा केही सुस्तता आएको बताएका छन्।
सोमबार काठमाडौंमा आयोजित कृषि विकास बैंकको ५८औं वार्षिकोत्सवमा सम्बोधन गर्दै गभर्नर अधिकारीले बैंकको ऋण नतिर्न उक्साउने गतिविधिले अर्थतन्त्रमा नकारात्मक प्रभाव पारेको स्पष्ट पारे।
गभर्नर अधिकारीका अनुसार, बाढी र पहिरो जस्ता प्राकृतिक विपद्ले ठूलो प्रभाव पारे पनि राष्ट्र बैंकको बाह्य क्षेत्र सबल रहेको छ। बैंकिङ प्रणालीमा तरलता सन्तोषजनक छ, र बैंकहरू पर्याप्त पुँजीकरण भएको अवस्थामा छन्।
गभर्नरले बैंकिङ प्रणालीमा देखिएका अराजकताका घटनाले दीर्घकालीन रूपमा अर्थतन्त्रलाई असर पुर्याउन सक्ने चेतावनी दिए। तर, यस्ता गतिविधि दीर्घकालसम्म नटिक्ने बताउँदै उनले बैंकिङ प्रणालीलाई सबल बनाउन आवश्यक कदम चाल्ने प्रतिबद्धता व्यक्त गरे।
गभर्नर अधिकारीले स्वस्थ बैंकिङ प्रणाली र समुचित वित्तीय व्यवहारले मात्र अर्थतन्त्रलाई दिगो विकासको मार्गमा अघि बढाउन सक्ने उल्लेख गर्दै सबैलाई जिम्मेवार बन्न आग्रह गरे।