काठमाडौँ,०७ माघ । त्रिभुवन विश्वविद्यालयले स्वतन्त्र विद्यार्थी युनियन (स्ववियु) निर्वाचनको मिति परिवर्तन गर्दै चैत ५ गतेका लागि तय गरेको छ। यसअघि फागुन १५ गतेका लागि घोषणा गरिएको निर्वाचन नयाँ मितिमा सारिएको हो।
विद्यार्थी कल्याण तथा खेलकुद निर्देशनालयका निर्देशक पशुपति अधिकारीले चैत ५ गते स्ववियु निर्वाचन गर्ने निर्णय गरिएको जानकारी दिए। उनका अनुसार दुई वर्षअघि पनि सोही मितिमा निर्वाचन सम्पन्न भएकाले यस पटक पनि त्यही दिनलाई चयन गरिएको हो।
निर्वाचन मिति परिवर्तनको कारणबारे विस्तृत विवरण सार्वजनिक नगरिए पनि तयारी र व्यवस्थापनका पक्षलाई ध्यानमा राखेर निर्णय गरिएको अनुमान गरिएको छ। चैत ५ गते हुने निर्वाचनले त्रिवि परिसरमा विद्यार्थी नेतृत्व चयनको प्रक्रियालाई अघि बढाउनेछ।
