काठमाडौं, २२ माघ । नेपाल बचत तथा ऋण केन्द्रीय संघ (नेफ्स्कुन) का पदाधिकारीहरूले वित्तीय विवरणमा हेरफेर गरी नक्कली नाफा देखाएको प्रकरणले कानूनी संकट निम्त्याएको छ। खराब कर्जाका लागि नोक्सानी व्यवस्थापन नगरी नाफा देखाएर लाभांश वितरण गर्ने निर्णयले सहकारी ऐन २०७४ अन्तर्गत गम्भीर कानूनी मुद्दा खडा गरेको छ ।
नेफ्स्कुन अध्यक्ष चन्द्रप्रसाद ढकालले वित्तीय विवरण हेरफेर गरी नाफा देखाएर प्रतिफल दिने निर्णय भएको स्वीकार गरेका छन्। सहकारी ऐनको दफा १२२ र १२४ अनुसार वित्तीय विवरण किर्ते तथा जालसाजीमा संलग्न व्यक्तिलाई १० वर्षसम्म कैदको प्रावधान रहेको छ ।
कानून अनुसार कागजातको मिति, अंक वा विवरण हेरफेर गरी झूटो तथ्य प्रस्तुत गर्ने कार्यलाई गम्भीर अपराध मानिन्छ। नेफ्स्कुन प्रकरणले सहकारी संस्थाहरूको पारदर्शिता र वित्तीय अनुशासनमा प्रश्न खडा गरेको छ ।