काठमाडौं, २२ माघ । नेपाल टेलिकमले आफ्नो २१ औं वार्षिकोत्सवको अवसर पारेर इ-सिम र भोवाईफाई सेवा सुरु गरेको छ। अब ग्राहकहरूले इ-सिम सेवा लिनका लागि काउन्टरमा जानुपर्ने झन्झट बेहोर्नु पर्ने छैन। टेलिकमका अनुसार इ-सिम अब नेपाल टेलिकमको मोबाइल एप वा वेबसाइटमार्फत सहजै प्राप्त गर्न सकिनेछ।
टेलिकमकी प्रबन्ध निर्देशक संगिता पहाडीका अनुसार इ-सिम एक भर्चुअल सिम हो, जसले भौतिक सिमकार्डको आवश्यकता हटाउनेछ। यो सेवा प्रयोग गर्नका लागि इ-सिम सपोर्ट गर्ने ह्यान्डसेट आवश्यक पर्नेछ।
साथै, टेलिकमले आजैबाट भोवाईफाई सेवाको व्यावसायिक सुरुवात गरेको छ। यस प्रविधिमार्फत ग्राहकहरूले देशभित्र वा बाहिर वाईफाई नेटवर्कमा जडान भएर टेलिकमको मोबाइल नम्बरबाट भ्वाइस कल तथा एसएमएस सेवा प्रयोग गर्न सक्नेछन् ।