काठमाडौँ, २४ माघ । सरकारले वैदेशिक रोजगारीमा रहेका नेपाली कामदारलाई रोजगारदाता देशबाटै पुनः श्रम स्वीकृति दिन थालेको छ। मस्कटस्थित नेपाली दूतावासले यो सेवा ओमानको सलालाबाट सुरु गरेको हो ।
दूतावासले सामाजिक सुरक्षा कोष आबद्धता तथा पासपोर्ट-कन्सुलरसम्बन्धी कार्यक्रमसँगै पुनः श्रम स्वीकृति प्रदान गर्न थालेको जानकारी दिएको छ । नेपाली राजदूत डोरनाथ अर्यालका अनुसार यो व्यवस्था लागू भएपछि भिसा म्याद सकिएका र अवैध कामदारलाई वैधानिक प्रक्रिया सहज हुनेछ ।
वैदेशिक रोजगार विभागका महानिर्देशक सूर्यबहादुर खत्रीले केही कामदारलाई पुनः श्रम स्वीकृति प्रदान गर्दै नेपाली कामदारको हकहित संरक्षणमा सरकार प्रतिबद्ध रहेको बताए ।
ओमानमा करिब ६० हजार नेपाली कामदार कार्यरत रहेको दूतावासको अनुमान छ, जसमध्ये १५ हजारभन्दा बढी अवैध रूपमा बसेर काम गरिरहेका छन् ।
श्रम, रोजगार तथा सामाजिक सुरक्षा मन्त्रालयका अनुसार ओमानपछि कतार, साउदी, यूएई र मलेसियाबाट पनि पुनः श्रम स्वीकृति वितरण गरिनेछ ।
