काठमाडौं, २४ माघ । काठमाडौँको कुलेश्वरस्थित २८ वर्षीया अस्मिता आचार्यलाई प्रहरीले ‘हनी ट्र्याप’ मार्फत आपराधिक लाभ उठाएको आरोपमा पक्राउ गरेको छ ।
मङ्गलबार काठमाडौँ उपत्यका अपराध अनुसन्धान कार्यालयको टोलीले उनलाई पक्राउ गरेको हो । अस्मिताले एक इलेक्ट्रोनिक्स मर्मत गर्ने व्यक्तिलाई योजनाबद्ध तरिकाले फसाएर ठूलो रकम असुलेकी थिइन् ।
प्रहरी अनुसन्धानअनुसार, आचार्यले पीडितलाई राइस कुकर मर्मत गर्ने बहानामा आफ्नो कोठामा बोलाइन् र त्यसपछि विभिन्न दबाब र धम्की दिएर रकम माग्न थालिन् । पीडितले रकम दिन अस्वीकार गरेपछि झुटो मुद्दामा फसाउने धम्की दिएको खुलासा भएको छ ।
आचार्यले १० लाख रुपैयाँ असुल्ने योजना बनाएको र पीडितबाट ३ लाख चेकमार्फत र बाँकी ७ लाख रकम एक साताभित्र मागिएको जानकारी प्राप्त भएको थियो ।
प्रहरीले निगरानी राख्दै उनलाई पक्राउ गरी भद्रकालीस्थित जिल्ला प्रहरी परिसरमा थप अनुसन्धान थालेको जनाएको छ। आचार्यविरुद्ध आपराधिक लाभसम्बन्धी मुद्दा दर्ता गरिएको छ र कानुनी प्रक्रिया अगाडि बढाइने बताइएकाे छ ।
