एजेन्सी, २४ माघ । ब्यूनस आयर्स — अर्जेन्टिनाले विश्व स्वास्थ्य संगठन (डब्ल्यूएचओ) बाट बाहिरिने निर्णय गरेको छ। राष्ट्रपति जेभियर मिलेईको निर्देशनमा विदेश मन्त्री गेरार्डो वर्थेनलाई डब्ल्यूएचओमा अर्जेन्टिनाको सहभागिता फिर्ता लिन आदेश दिइएको राष्ट्रपति प्रवक्ता म्यानुएल एडोर्नीले पत्रकार सम्मेलनमा जानकारी दिएका छन्।
एडोर्नीले निर्णयको कारण स्वास्थ्य व्यवस्थापनसम्बन्धी गहिरो मतभेद रहेको बताए। विशेष गरी महामारीको समयमा डब्ल्यूएचओले मानव इतिहासको सबैभन्दा लामो लकडाउनलाई बढावा दिँदै राजनीतिक प्रभावलाई सघाएको आरोप लगाइएको छ।
राष्ट्रपति कार्यालयले जारी वक्तव्यमा डब्ल्यूएचओले महामारीको समयमा अन्तहीन क्वारेन्टाइनलाई प्रोत्साहन दिँदै आर्थिक क्षति पुर्याएको दाबी गरेको छ। वक्तव्यमा अन्तर्राष्ट्रिय संगठनहरूको भूमिका र उद्देश्यलाई पुनर्विचार गर्न आवश्यक रहेको बताइएको छ।
अर्जेन्टिनाको यो घोषणा अमेरिकी पूर्व राष्ट्रपति डोनाल्ड ट्रम्पले डब्ल्यूएचओबाट अमेरिकालाई फिर्ता लिने निर्णय गरेपछि आएको हो।
