काठमाडौँ,२८ माघ । दक्षिणकाली नगरपालिका–३ भन्ज्याङस्थित जुनकिरी इंग्लिस बोर्डिङ स्कुलको बस आइतबार दुर्घटनामा परेर चालक र एक विद्यार्थीको मृत्यु भएको छ भने ४५ जना घाइते भएका छन्। विद्यार्थीहरू खेलकुद सप्ताह मनाइरहेका बेला विद्यालयको बस दुर्घटनाग्रस्त भएको हो।
दुर्घटना विद्यालयबाट छुटेको केही मिनेटमै भयो। बस १५० मिटर तल डल्लु खोलामा खसेको प्रहरीको जानकारी छ। दुर्घटनामा ३५ वर्षीय चालक राधाकृष्ण मगर र ८ वर्षीय विद्यार्थी विपिन श्रेष्ठको उपचारका क्रममा मृत्यु भएको छ।
घाइतेहरूको मनमोहन अस्पताल, कीर्तिपुर अस्पताल, ट्रमा सेन्टर, मेडिसिटी अस्पताल, दक्षिणकाली नगर अस्पताल, वयोधा अस्पताल, सहिद मेमोरियल अस्पताल, नर्भिक अस्पताल, र स्टार अस्पतालमा उपचार भइरहेको छ।
दुर्घटनाको कारणबारे अनुसन्धान जारी रहेको प्रहरीले जनाएको छ। प्रारम्भिक अनुसन्धानअनुसार बसमा क्षमताभन्दा धेरै यात्रु रहेको र चालकको लापरबाही हुन सक्ने अनुमान गरिएको छ।
