काठमाडौं, २ फागुन । काठमाडौंबाट नुवाकोटको त्रिशूलीतर्फ जाँदै गरेको ट्रकमा लोड गरिएको एमोनिया ग्यास सिलिन्डर लिक हुँदा त्रिभुवन राजपथ अन्तर्गत धादिङको धुनीबेंसी नगरपालिका-८ बाहुनडाँडामा धुवाँ निस्किएको छ ।
- Advertisement -
बा २ ख ४६७३ नम्बरको ट्रकमा कोल्ड स्टोरमा प्रयोग हुने एमोनिया ग्यास लोड गरिएको थियो। ग्यास लिक भएर धुवाँ निस्किएको खबर पाएपछि इलाका प्रहरी कार्यालय खानीखोलाबाट खटिएको प्रहरी टोलीले दमकलको प्रयोग गरी स्थिति नियन्त्रणमा लिएको हो।
प्रहरीका अनुसार ट्रकमा रहेका १७ वटा सिलिन्डरमध्ये एउटा सिलिन्डरमा ग्यास लिक भएको हो। सुरक्षाको लागि केही समय राजमार्ग अवरुद्ध गरिए पनि नियन्त्रणपछि ट्रक आफ्नो गन्तव्यतर्फ पठाइएको प्रहरीले जनाएको छ।
