जनकपुर,०२ फागुन । पाँच वर्षअघि श्रीमतीको हत्या गरेर फरार भएका श्रीमान् सन्तोष साहलाई प्रहरीले पक्राउ गरेको छ। सन्तोष साह सप्तरीको शम्भुनाथ नगरपालिका-२ का निवासी हुन्।
सप्तरी प्रहरीले बिहीबार साहलाई पक्राउ गरेर अनुसन्धान सुरु गरेको जानकारी प्रहरी उपरीक्षक ढकेन्द्र खतिवडाले दिएका छन्।
खतिवडाका अनुसार, साहले २०७६ साल चैत ६ गते राति श्रीमती गायत्रीकुमारीलाई कुटपिट गरी शम्भुनाथ नगरपालिका-२ ट्राफिक चोकदेखि ४०० मिटर पूर्वमा फालिएका थिए। भोलिपल्ट स्थानीयहरूले गायत्रीलाई फेला पारेर युनिक अस्पतालमा उपचारको लागि लगेका थिए, जहाँ उनको मृत्यु भएको थियो।
त्यसयता सन्तोष फरार थिए। सन्तोष र गायत्रीको बिहे २०७६ साल जेठ २६ गते भएको थियो, र बिहे पछि दुवै जनाबीच बारम्बार विवाद भइरहेको थियो।
राजविराज जिल्ला अदालतले सन्तोषलाई कर्तव्य ज्यान मुद्दामा तीन दिन हिरासतमा राखेर अनुसन्धान गर्न प्रहरीलाई अनुमति दिएको छ।
