काठमाडौं,२७ फागुन । ललितपुर क्षेत्र नम्बर–३ बाट निर्वाचित सांसद डा. तोसिमा कार्कीको पद रहने वा नरहने भन्ने विषयमा आज (फागुन २७) फैसला हुने सम्भावना छ। यसअघि फागुन ४ गतेका लागि तोकिएको मुद्दाको निसु (निर्णय सुनाइने दिन) आजका लागि सारिएको थियो।
राष्ट्रिय स्वतन्त्र पार्टी (रास्वपा)की उम्मेदवार तोसिमा कार्कीको उम्मेदवारी निर्वाचन आयोगले खारेज गरेपछि यो विषय सर्वोच्च अदालतसम्म पुगेको थियो। अन्तरिम आदेशमार्फत चुनाव लड्ने अवसर पाएकी तोसिमा अन्ततः ललितपुर–३ बाट निर्वाचित भइन्। तर, उनको उम्मेदवारी खारेजीको विषय अहिलेसम्म कानुनी विवादकै बीच रहेको छ।
पुस २५ गतेदेखि उनको मुद्दा सर्वोच्च अदालतका न्यायाधीश डा. मनोजकुमार शर्मा र महेश शर्मा पौडेलको इजलासमा विचाराधीन छ। अब आजको फैसला उनका लागि निर्णायक बन्नेछ। यदि अदालतले उनको पक्षमा निर्णय गरेन भने सांसद पद गुम्ने खतरा छ। यस विषयमा अदालतको अन्तिम निर्णय आउने अपेक्षा गरिएको छ।
