काठमाडौं, २७ फागुन । नेपाल राष्ट्र बैंकका अनुसार चालु आर्थिक वर्ष २०८१/८२ को सात महिनामा नेपालको वस्तु निर्यातमा ४६.५ प्रतिशतको उल्लेख्य वृद्धि भएको छ। यस अवधिमा १ खर्ब २७ अर्ब २० करोड रुपैयाँको निर्यात भएको छ, जबकि अघिल्लो वर्षको सोही अवधिमा निर्यातमा ७.१ प्रतिशतको गिरावट आएको थियो। भारत, चीन र अन्य मुलुकहरूतर्फको निर्यातमा क्रमशः ६६.९%, ८.६% र ३.५% वृद्धि भएको देखिएको छ ।
प्रमुख निर्यात वस्तुहरूमा भटमासको तेल, पोलिस्टर यार्न, चिया, अलैंची र पार्टिकल बोर्ड रहेका छन्, जबकि पाम तेल, जिंक शिट, अदुवा र जडिबुटीको निर्यातमा गिरावट आएको छ ।
आयातमा भने १०.१ प्रतिशतको वृद्धि भएको छ र यो ९ खर्ब ८८ अर्ब ५९ करोड रुपैयाँ पुगेको छ। यस अवधिमा आयातका प्रमुख वस्तुहरूमा भटमासको कच्चा तेल, चामल, यातायात उपकरण र खाने तेल रहेका छन्, भने पेट्रोलियम पदार्थ र पामको कच्चा तेलको आयात घटेको छ ।
यसका कारण, कुल वस्तु व्यापार घाटा ६.२ प्रतिशतले वृद्धि भई ८ खर्ब ६१ अर्ब ३८ करोड रुपैयाँ पुगेको छ। आयात र निर्यातको अनुपात १२.९ प्रतिशत पुगेको छ, जुन अघिल्लो वर्षको ९.७ प्रतिशतको तुलनामा सुधार भएको हो ।
